முத்துச்சிப்பி

கே.விஸ்வநாத் இயக்கத்தில் கமலஹாசன் கதாநாயகனாக நடித்து மாபெரும் வெற்றி பெற்ற தெலுங்குப் படமான  'ஸ்வாதிமுத்யம்'  மொழி மாற்றம் செய்யப்பட்டு 'சிப்பிக்குள் முத்து'  என்ற பெயரில் 1986ஆம் வருடம் தமிழில் வெளியானது. ஏனோ தமிழில் டப்பிங் பேச கமலஹாசன் மறுத்து விட்டார். பின்பு கே.விஸ்வநாத்தின் உறவுக்காரரும் பிரபல பாடகருமான எஸ்.பி.பாலசுப்ரமணியம் கமலஹாசனுக்காக டப்பிங்  பேச,  அதனாலேயே கமலின் அற்புதமான நடிப்பை தமிழ்ப் பதிப்பில் பூரணமாக ரசிக்க இயலாமல் போனது.

ஆனாலும் இந்தப் படத்தில் உலகம் என்னவென்றே தெரியாத அப்பாவி இளைஞனாக கமல் பிரமாதப் படுத்தியிருப்பார்!

அதிலும்  ராதிகாவுடனான  'துள்ளி துள்ளி' என்ற பாடல் காட்சியில், ஒரு 'அச்சுப் பிச்சு' டான்ஸ் ஆடியிருப்பார் பாருங்கள், அசத்தல்!  டான்ஸே தெரியாத ஒரு மனிதன் மனம்போன  போக்கில் ஆடினால் எப்படியிருக்குமோ அப்படி ஆடி, அதையும் பாடலோடு பொருந்திப் போகிறமாதிரி, அனைவரும் ரசிக்கிறமாதிரி செய்திருப்பார் கமல்! 

அப்பொழுது இதை பத்திரிகைகளும் ஊடகங்களும் ஆகா ஓகோவெனப் புகழ்ந்து எழுதின.

'இதுவரைக்கும் இந்த மாதிரி யாரும் பண்ணினதேயில்லை' என்றும் பாராட்டின.

ஆனால் அது உண்மையல்ல....

'சிப்பிக்குள் முத்து' 1986இல்தான் வெளியாகியது.

அதற்குச் சரியாக 16 வருடங்களுக்கு முன்பே, அதாவது 1970ஆம் வருடம் வெளியான, நடிகர் பாலாஜியின் சுஜாதா சினி ஆர்ட்ஸ் தயாரிப்பில், ஏ.சி.திருலோகசந்தர் இயக்கத்தில் நடிகர் திலகம் சிவாஜியும், ஜெயலலிதாவும் நடித்த, ஜெயலலிதாவுக்கு அந்த ஆண்டின் தமிழக அரசின் 'சிறந்த நடிகை' பட்டம் கிடைக்கக் காரணமாயிருந்த, வெள்ளிவிழாக் கண்ட 'எங்கிருந்தோ வந்தாள்' என்ற படத்தில்,  அதிர்ச்சியான சம்பவமொன்றினால் பழசெல்லாம் மறந்து போன ஒரு மனமுதிர்ச்சி குறைந்த இளைஞனாக வாழ்ந்திருப்பார் நடிகர் திலகம்!

அதிலும் ஜெயலலிதாவுடனான 'சிரிப்பில் உண்டாகும் ராகத்திலே' என்ற பாடல் காட்சியில் ஒரு 'கன்னா பின்னா' டான்ஸ் ஆடுவார் பாருங்கள், அசத்தலோ அசத்தல்! டான்ஸ் என்னவென்றே தெரியாமல் ஆடி....அடடா, அந்தச் சேஷ்டைகளும்,

நயனங்களும்....காணக் கண் கோடி வேண்டும்! 

ஆக,  பின்னாளில் கமலஹாசன்

நடித்த ஒரு நடிப்பை, அதற்குப் பதினாறு வருடம் முன்பே 'ஜஸ்ட் லைக் தட்' செய்து முடித்து விட்ட சிவாஜி, 'நடிகர் திலகம்' அல்லாமல் வேறென்ன?

கமலஹாசன் மட்டுமல்ல, இன்னும் பல நூறு வருடங்களுக்கு  யார் எப்படி  நடித்தாலும்,  சிவாஜி அதை முன்பே தன் ஏதோ ஒரு படத்தில், ஏதோ ஒரு இடத்தில் செய்திருப்பார் என்பதை நினைவில் கொள்க!

வானத்திற்கு ஒரே சூரியன்! ஒரே நிலவு!

திரையுலகிற்கு ஒரே 'நடிகர் திலகம்' சிவாஜி மட்டும்தான்!

#மநாச

(மீள்பதிவு)

479479

187 கருத்துகள்

58 பகிர்வுகள்

விரும்பு

கருத்துத் தெரிவி

பகிர்